प्रकल्पांतर्गत निवडलेल्या प्रत्येक गावांमध्ये महाराष्ट्र ग्रामपंचायत अधिनियम, 1959 (49) अन्वये ग्राम कृषि संजीवनी समिती स्थापन करणेचा निर्णय घेणेत आलेला आहे. सदर समिती ग्रामपंचायतीची विकास/ प्रकल्प समिती म्हणून कार्यरत असेल. समितीमधील कार्यकारी सदस्यांची संख्या 13 असेल. समितीमधील एकूण सदस्यांपैकी किमान दोन तृतीयांश सदस्य अत्यल्पभूधारक (जमीनधारणा 1 हे. पर्यंत) किंवा अल्पभूधारक (जमीनधारणा 1 ते 2 हे.) असतील. तसेच एक तृतीयांश सदस्य हे ग्रामपंचायत सदस्यांपैकी असावेत. त्याचप्रमाणे समितीमध्ये महिला सदस्यांचे प्रतिनिधित्व किमान 50% असणे बंधनकारक आहे. सदर समितीमध्ये ग्रामपंचायतीच्या ज्या गावांमध्ये प्रकल्प राबवायचा आहे त्याच गावातील सदस्यांचा समावेश राहील. (मात्र सरपंच व उपसरपंच यासाठी अपवाद असतील.) समितीची रचना पुढीलप्रमाणे असावी.

अ.क्र	समिती सदस्य व त्यांचा प्रवर्ग/ कार्यक्षेत्र	सदस्य संख्या	पदनाम
1.कार्यकारी सदस्य
1	सरपंच	1	पदसिद्ध अध्यक्ष
2	उप सरपंच	1	पदसिद्ध सदस्य
3	ग्रामपंचायत सदस्य- (पुरुष 1 व महिला 1)	2	सदस्य
4	प्रगतशील शेतकरी (सर्वसाधारण- 1, अ. जाती/अ. जमाती/ विमुक्त जाती/भटक्या जमाती -1)	2	सदस्य
5	महिला शेतकरी (सर्वसाधारण- 1, अनुसूचित जाती/अ.जमाती -1, विमुक्त जाती/भटक्या जमाती -1)	3	सदस्य
6	शेतकरी उत्पादक गट/कंपनी प्रतिनिधी	1	सदस्य
7	महिला बचत गट प्रतिनिधी	1	सदस्य
8	कृषि पूरक व्यावसायिक शेतकरी	2	सदस्य
अ.	एकूण कार्यकारी सदस्य	13
2.अकार्यकारी सदस्य
1	कृषि सहाय्यक	1	पदसिद्ध तांत्रिक सदस्य
2	ग्राम सेवक / ग्राम विकास अधिकारी	1	सदस्य सचिव
3	समूह सहाय्यक	1	सह सचिव
4	कृषि मित्र	1	विस्तार कार्य प्रेरक
ब.	एकूण अकार्यकारी सदस्य	4